هيحصل ايه؟

زهقنا باة.. تعبنا باة.... مش معقول كدة , فاض بينا خلاص

ليه يا بني بس كدة؟... دي الدنيا حلوة والله ... بس احنا اللي فاهمينها غلط

فاهمين ايه غلط يا عم الحاج؟ ..... بقلى لا شغل ولا حب ولا جواز ولا مستقبل ولا اي حاجة... وتقوللي حلوة؟... دا انت اللي حلو. يعني انا افضل كدة من غير ولا حاجة .. وفي غيري عنده كل حاجةومش عارف يودي الفلوس فين؟ ... يرضي مين دة بس يا ربي؟

يا بني هي الدنيا كدة.. ناس معاها وناس معاهاش... احنا في ايدنا ايه نعمله؟

لا احنا في ادينا كتير قوي

هي كدة ناس تنهب .. وناس ما بيدها حيلة

هو مين دة اللي ما بيده حيلة؟..... بكرة كلنا نشوف

في الواقع ... لا الشاب دة ساخط على قضاء الله وقدره ومش مؤمن بحكمة ربنا... ولا الراجل العجوز دة كمان راجل اهبل ومطاطي وراضي بالظلم الليواقع عليه وفرحان بعيشته كدة

انما الاتنين مظلومين

الاول:شاب طموح - عادي يعني .. زي بقيت الشباب اللي خلقهم ربنا - وخلاص .. فاض بيه ومش قادر يستحمل اكعر من كدة ... لانه شايف قدامه ظلم وفساد ومحسوبية ووساطة وخد عندك شوية بيروقراطية وخصخصة وتفرقة وتوريث وجمال وكمال ... ودلال وامال , وناس معاها وناس معاهاش.. والواد يا حبة عيني هيتجنن خلاص

والثاني: راجل كبير في السن .... عاش كتير وشاف اكتر

واكيد في يوم من الايام كان عنده حماسة الشباب دي.. والغضب دة اللي مالي الاول

بس لقى مفيش فايدة في الحكومة ولا في الناس اللي ماسكين البلد -قصدي العزبة-... فهو سعى كتير قوي عشان يلاقي حل لالي هو وغيره فيه

بس جاتله حالة ياس من اللي مسيطرين عليها واللي بيحصل فيها.. وشاف العجب .. اشي اهمال وتعيين بالاقدمية... وسحل وضرب وقانون طوارىء ومعتقلات وبيع للبلد ولجنة سياسات ومؤخرا توريث ...و...و... ولو عدينا مش هنخلص

الراجل دة مر عليه استهمار لبلده من ناس كتير قوي .. بس عمره ما فكر انها ممكن تستعمر من مصريين -عفوا مواطنين - ..... يييييييييوه قصدي نهابين مواطنين

الراجل دة حصله حالة ركود مؤقت في رغبته للتغيير.. لكنها عمرها ما هتموت

طول ما في ناس بتنهب البلد.. واول ما تجيله فرصة عشان يقول اللي في نفسه .. عمره ما هيتردد ابدا

لكن تعالوا نتكلم شوية عن الشاب دة .. اللي جواه حالة من الغليان زالغضب المكبوت .. واللي يعتبر قنبلة موقوتة للانفجار

و اللي اول ما يفكر ينفجر ... ينفجر....... ولما ينفجر... تفتكروا هيحصل ايه؟

دي كانت حكاية اثنين .. من جيلين مختلفين.. مختلفين صحيح ... وممكن يكونوا مختلفين في حاجات كتير قوي تانية

بس الحاجة الوحيدة اللي متفقين عليها

هي حقهم و حق البلد اللي عايشين عليها هما الاثنين

بس كل واحد بطريقته

لكن لما يلاقوا طريقة واحدة يجتمعوا عليها

اكيد هيتحدوا ومش هيسيبوا بعض ابدا

وهيحصل

فكروا معايا في اللي هيحصل

ومستنية ردكم