مهزلة مدارس برج العرب وادارتها المحترمة

مدرسة الميثاق المبجلة

انني وللاسف مدرسة تربية فنية في هذه المدرسة- العظيمة جدا -....بصراحة انا اشتغلت في المدرسة دي نظرا لزن امي المتواصل علي ...ان الشغل في الحكومة هو الافضل ..ويابنتي بصي للمستقبل .. دي فيها معاشات ..غير الحوافذ والمكافئات...وغيرها من كلام الناس الكبارة دول -مع ان ماما مش كبيرة قوي يعني-.. المهم قدمت علشان اخلص من الزن واريحها ...وكنت بادعي انهم مايقبلوني زي كتير من الناس اللي عايزين يتعينوا ومش لاقيين..بس للاسف قبلوني .. وسلمت امري لربنا ورحت ..وما ادراكوا ما حصلي ...نزلت على اول الشارع بتاع المدرسة النبجلة -وكان عندي علم ان المدرسة بعيدة شوية عن الشارع- بس اللي اكتشفته انها بعييييييييدة جدااا عن الشارع ..المهم دخلت المدرسة وانا باقول "انا مش جاية هنا تاني"....بس للاسف رحت مرة واتنين وتلاتة بعد ما لقيت الكاست هناك لذيذ وكلهم شباب وقلت اهه تغيير بدل القعدة في البيت -وانامن اعداء القعدة في البيت...وبدات الماساه .....المدرسة دي ابتدائية واعدادية...لكن الابتدائي فيها منفصل عن الاعدادي...واول مارحت بدات حصة في الابتدائي

دخلت سنة سادتة ووانا بتكلم معاهم في اساسيات الرسم دخل عليا مدرس قاللي :"قدامك كتير ؟" رديت عليه باستغراب :"لما تخلص الحصة".. قاللي :"لآ هنا مقيش حصصهي كدة " مفهمتش حاجة بس نظرا لاني مكنتش عايزة اقعد اكثر من كدة في الفصل لان الاطفال اللي فيه -اذا صح التعبير- كانوا غراب جدا فقتتله:" ربع ساعة بس" ...بعد كدة عرفت الماساه ان مفيش جرس..ولا حصص ... الا للفسحة والمراويح

يعني لما ربنا يبليك بدخول فصل تاكد انك مش هتطلع منه الا في الفسحة ...وبقينا بنستنا الفسحة زي الولاد بالضبط

ودةكان مقابل انك تاخد يوم راحة -تغيب ويمضولك-وتاخد مرتبك العظيم وانت مبسوط ومفيش اي تعذيب للضمير انك خدت اجر يوم ..يومين.. عشرة مابتجيش فيهم حتى لو كنت بتطحن طول الايام..وحتى لو كان المرتب دة مخزي جدا -ري ماهوة حاصل -فبتضطر ان تنحي ضميرك جانبا وتديله قرص .. اتنين ...عشرة منوم عشان مايصحاش ابدا ويفسد عليك عيشتك الضنك دي.......اما المدير المبجل بتاع المدرسة الابتدائي دي فهو مدير فاشل ..فاشل الى ابعد الحدود

يا اخي المدرسة 6 فصول ومش عارف يديرها ابدا..وطول اليوم يقولك: انتوا ماتعرفوش مين علي مبروك-هو-مهو لو عرف هو مين وعايز ايه كان ارتاح وريحنا كلنا معاه

اما المدرسة الاعدادي باة..فهي والحق يتقال منظمة اكتر بكتير ..كفاية ان المجير فيها عارف هو عايز ايه..صحيح فيها ايام راحة ..بس منظمة والحصص بالساعة

المهم من كل دة..هي مشكلة العمل الحكومي اللي عمره ماعايز يتصلح ابدا..الولاد دول عرب والتعليم لهم في المدارس مهم جدا لانهم مابيخدهوش من اي حتة تانية(مراكز ثقافة او شيء من هاذا القبيل)حياتهم كلها الغنم والقرية البقر وغيرها

دة غير انهم بيتجرزوا بدري جدا

وبعيدا عن كل دة ...في مقال عجبني قوي في جريدة الدستور ... كتبه احمد الدريني

حسيت انه لمسني قوي ...كان عنوانه"ان تكون نسرا محلق في السماء او تكون بطة برية تنظر للارض"وكان بيتكلم فيه عن الوظائف الحكومية وازاي بتخلي البني ادم بطة طول اليم بتقول كااااااااااااك

لم تروح الشغل وتلاقي الاحقاد مالية الناس وكل واحد عايز يضرب فيالتاني من تحت لتحت ..وترجع البيت وتلاقي مراتك عملالك الاكل وتاكل وتنام وتصحى تقعد تدفرج شوية على المسلسل العربي النفخ- لكن ماعندكش حل تاني وبعدين تقعد تقرا الجرنال واكيد هتبقى الاخبتر او الاهرام او الجمهورية ...ويبقى هو دة يومك كل يوم لغايت ما تموت واني بتقول كاااك...واهلك بيقولوا كاااك... واصحابك اللي زيك بيقولوا كاااك ... ولما تموت يخدوك وهم بيقولوا كااك ويدفنوك ويمشوا ويسيبوك وكلهم بيقولوا كااااك ...كاااااك.... كااااااااااااااااااك

وعلشان كدة انا دلوقتي حاسة اني بقول كااااااااااااااك

ويلا باي ...... قصدي كااااااااااااك